أخبار وطنية في رسالة نشرتها عائلتها: الناشطة الحقوقية شريفة الرياحي تطلب التحقيق معها في حالة سراح حتى تتمكن من الاعتناء بابنيها الصغيرين
نشر في 26 جوان 2024 (21:54)
نشرت عائلة الناشطة الحقوقية شريفة الرياحي رسالة نقلت فيها طلبها بمواصلة التحقيق معها في حالة سراح حتى تتمكن من الاعتناء بابنيها الصغيرين.
وهذا ما ورد في رسالة العائلة:
"عسلامة الناس الكل، عيدكم مبروك وان شاء الله تكونو بخير، وربي يفرج على شريفة وكل المظلومين.ات .
شريفة تشدت من نهار 07 ماي، عندها توا 46 يوم (10 أيام في بوشوشة، والباقي في منوبة). بش ننشر قريبا حوصلة للقضية ومسارها، أما حبيت في الأثناء نقوللكم حويجات، شوية أخبار وبعض التأكيدات :
1. شريفة بخير، معنواياتها عالية صحتها بخير وثقتها كبيرة وهي تتعامل مع الأمر كيفما تعرفوها : الصبر، والشجاعة. أما متقلقة برشا برشا على صغارها.
2. شريفة بريئة من التهم الغريبة الموجهة ليها، وأحنا في العائلة فخورين بها وبانسانيتها وشجاعتها وما عندنا فيها حتى أدنى شك
3. التهم غريبة على خاطر ما فما حتى شيء في الدوسي يثبت وجود جرائم من أصله، وتوا تبان الأمور على حقيقتها لاحقا
4. قاضي التحقيق قام بعدة خطوات في اتجاه انه يعرف إن كان هناك جرائم وإلا ما فماش، سمى خبراء وسمع شهادات وطلب تساخير...
5. الجمعية تشتغل في كنف القانون والشفافية وحساباتها مريقلة وتتعاون مع عديد الأجهزة من الدولة وتقوم بإسناد المؤسسات العمومية في التعامل مع طالبي اللجوء منذ أكثر من 12 سنة، خدمت على الليبية والسوريين والفلسطينيين والسودانيين وغيرهم. وشريفة خرجت منها عندا قريب عامين.
6. شريفة إنسانة صاحبة مبادئ وتحب تونس برشا وبنت العمومي 100% ورياضية هازة دوبليات وطول عمرها وهي متطوعة ومناضلة ومواطنة. هي بنت المجتمع المدني بمفهومه العميق والواسع معا، على خاطرها انسانة "حية" وقلبها حي، تخدم بش تحسن بلادها. حتى لو كان العبارة هذه اليوم ولات تدخل للحبس، فأنه دلالاتها الأصلية ثابتة في أذهان من يدركها.
7. أولاد شريفة في حاجة لأمهم وتواصل إيقافها هو عقاب ليهم وعنده تداعيات على صحتهم البدنية والنفسية.
8. هي على ذمة العدالة والأبحاث والتحقيق حتى لين يتسكر الدوسي لكن تطلب أنه يتم تركها في حالة سراح بش تتلهى بأولادها.
في الأخير،
شكرا شكرا شكرا لكل من جاء للدار والا اتصل بالعائلة وإلا ساند وتضامن على الفايسبوك وفي الاعلام وغيره.
شكر خالص جدا لأصحاب ورفاق وزملاء شريفة من المجتمع المدني الي اتصلو وعملو اللازم وساندو وتكلمو وكتبو. شكر خاص جدا زادة للي تفهمو وتريثو خاطر خافو لا يخلقو احراج.
نشكركم الكل برشا باسم أولادها، على خاطر انتم الضمانة الحقيقية على كون شريفة موش بش تتنسى في الحبس.
ربي يفرج عليها قريبا".
